1_إكتشفت إن في بنات ثائرات جميلات جداً وقدموا للبلد أرواحهم على طبق من فضة ، عن إني قابلت بنت من 13 اللي إحتجزوهم داخل مبنى المحافظة في الغربية من كام يوم أتحدث !
خلتني أعرف إن لسا جوايا كتير قوي عشان أقدموا ، خلتني أحس منغير ما تتعمد قد إيه أنا صغيرة ومهما عملت فأنا معملتش أي حاجة !
إكتشافك لوزنك الحقيقي مر وحلو .. وأنا مكملا ..
2_ماما طلعت بتتعب قوي ، بتلعب دور الأب والأم وسيدة الأعمال وست البيت ، ماما عاملا زي اللي بيلعب juggling balls بتلعب كذا دور ولازم توازن بينهم كلهم صح ولازم تلعب بيهم كلهم منغير ما حاجة تقع منها ، طول عمري بقول عليها super woman بس إتأكدت قوي من كدا لما نزلت أشتري معاها شوية حاجات بسيطة متجييش ربع اللي بتشتريه في العادي وتشيلو كلو لوحدها ، كنت معاها المرادي وحاولت أشيل ربع الحاجات بس رجعت بإيديا الإتنين واقفا ومش عارفة أحركهم .. يا رب أتخرس قبل ما أفكر أتخانق معاها ولا أعلق على أي حاجة بتعملها .. ربنا يخليهالي عشان أنا عايشة بحسها في الدنيا
3_السرطان The rock star of the death هوا ببساطة نجم نجوم حالات الوفاة في حياتي .. المرض دا بيلاحقني بيخطف مني ومن اللي حواليا أغلى ما لينا ، المرض دا ملعون ،النهاردة خطف والد واحدة من صديقاتي القريبات جداً جدا مني ، خطف من روحي حتة وإفتكرت جدتي اللي خطفها السرطان ، وافتكرت ناس كتير في حياتي وبراها بيعانوا منو وأنا بقف قداموا عاجزة مفيش بيدي حيلة غير وداع المحتضر ..
4_أنا دايماً بفقد ثقتي في إستنتاجاتي الغبية ، في التوقعات اللي بحطها ، دايماً بتقع على دماغي ، بتقع مع الناس كلها ، بتفتح دماغي وبتجرح قلبي في كل مرة ، إتعودت عليها من الناس ، إنما منك ! هحاول أتعود عليها ..
خلصت اليوميات المملة ، والمملة جدا جدا ..
وحشتيني يا نينه ..
1- مش كإنها مش حسستك إنك صغيرة بقدر ما حسستك إنك عندك طاقات مهولة لم تستخدم ؟ دي نقطة , أما النقطة التانية و هي نصيحة عابرة -و بحب أقولها دائما لكل شخص بلقاه نفسه يغير في محيطه و أنا أولهم لإني اتلدغت من الموضوع ده-: "لا تجعل رغبتك في التغيير تحولك لشخص سايكوباثي (معادي للمجتمع)" .
ردحذف2- ربنا يخليلك والدتك , و يحفظها , و يمد في عمرها , و يجعلك بارة بها .
3- ربنا يرحم والد صاحبتك و يسكنه فسيح جناته .
4- يقولك تشرشل "إن السياسي الجيد هو من يحسن التنبؤ بالمستقبل، كما يحسن تفسير ما حدث إذا أخطأت تنبؤاته", عموما إذا كان هذا الشخص "حبيب" فنصيحة سيبيكي منه , الحبيب اللي يجبرك على الدخول في دوامة التخمينات و التوقعات و الاستتنتاجات ليس بحبيب , بسميه "مشروع حبيب مجهض" , و لو كان يبادلك ذات النظرة كان ما سابكي تسلكي الدرب ده .
أخيرا , أن قرأت مدونتك دي وشوية من مدونتك التانية على عجالة, و بحب أقولك "يومياتك مش مملة أبدا" :)