الجمعة، 4 أكتوبر 2013

العطاء أفضل وسيلة للتواصل

خليك في حياة الناس منغير ما تسيب "آثار جانبية" بالعطاء .. السؤال على الناس ، إحترام وجهات نظرهم ، إحترام مواعيدك معاهم ، إحترامك ليهم شخصياً هيفرق كتير ..
السؤال مش حاجة بتيجي وقت ما اللي تعرفوا يبقى في أزمة أو ضيقة ويبقى غالبا سؤال لمجرد الفضول أكتر منو لغرض المساعدة  ..
السؤال الحقيقي اللي بيعكس الإهتمام والعطاء بيبقى منغير سبب ومنغير مبرر .. بيبقى مفاجئ وبيسيب حاجات حلوة كتير في الروح ..
العطاء إنك تسأل ، إنك تسمع ، إنك تسامح ..
ولما تسامح وتنضف قلبك أول بأول إنتا اللي هتبقى خفيف وطاير ، يعني إنتا بتعمل كدا لنفسك قبل أي حد، بتتفضل على نفسك قبل ما بتتفضل على الشخص اللي هتسامحو ..
العطاء إنك تفهم كويس جدا إن الناس اللي بتتعامل معاهم في حياتك اليومية ملهمش ذنب في مآساتك أو همومك وتعاملهم كويس وكويس جدا ..
العطاء إنك تبتسم ، تبتسم ، تبتسم !
العطاء منغير إنتظار مقابل أحلى وأطهر عطاء في الكون ..
 النهاردة ماما كانت بتقولي أطلع صدقة كل يوم ولا أستنى أجمعهم كلهم وأطلعهم يوم عرفة عشان الأجر في عرفة بيبقى أكبر !
قلتلها لو إنتي إستنتي الحسنات الزيادة يوم عرفة ، الجعان مش هيقدر يستنى ..
أي علاقة في الدنيا محتاجا عطاء ، وكل ما كان العطاء مطلق و بيتعمل بدافع الحب كل ما كان أقيم وأجمل للطرفين ..



هناك تعليق واحد:

  1. كان ليا صاحب بيقول ..انا همشي معاك وهنضحك وهنبسط ولما هشوف نفسنا هنتنرفز او هتشد اعصابنا هخليك..لانه انا عايز امشي معك مره تانيه...بإختصار كلامه بيقول انا عايز منك الزين اما الشين ما عاوزه ...والحياه بتمشي كده ..لو فكرنا في العطاء هنعرف انها حاجه جميله في الكون وهنفرح للناس كله..وكمان هننبسط نحن اكتر من الناس اللي انبسطت ...متشكره اوي على المقال الجميل..عجبني بجد.

    ردحذف