النهاردة بعد أذان الفجر ، قبل ما الشمس تشقشق بشوية كنا قاعدين كلنا مع ماما في الأوضة اللي بلكونتها بتطل عالزرع والخضرة والشجر والنخل ، البلكونة اللي فيها الزينة وقصاقيص رمضان اللي معلقينها ، الحقيقة بهجة رمضان كلها كانت برعاية البلكونة دي .
خير اللهم إجعلو خير في وسط نقاشتنا اللي من الطبيعي بتتطور خلال ثواني إنها تبقى خناقات ورخامة على بعضنا أنا وإخواتي ، ماما سكتتنا وقالتلنا إسمعوا الصوت دا كدا !!
سكتنا كلنا وقعدنا نسمع الصوت الصادر من مكان ما قريب من البلكونة ، صوت طائر ما ..
صوت الطائر دا كان أحلى من كل المزيكا اللي سمعتها في حياتي مجموعة على بعض ، أحلى من صوت كل المغنيين والمطربيين اللي ورموا إدين الناس من كتر السوكسيه اللي خدوه ، أحلى من صوت كل اللي حبيتهم في حياتي واللي صوتهم خلى قلبي يترعش ، أحلى من صوت بابا وهوا بينادي عليا بعد غيبة طويلة ، وأحلى من صوت عروستي اللي جبتها وأنا صغيرة اللي كل ما أضغط عليها تقولي "I LOVE YOU" أحلى من صوت الكمنجة اللي كنت بلعبها وأنا صغيرة وكبرت عليها أو بقت أحلى من إني ألعب عليها تاني ..
للأسف حاولت أنور القوضة والبلكونة بحثاً عن الطائر الأسطوري اللي خلاني أنتشي للدرجادي من جمال صوتو .. حاولت للأسف معرفتش
ماما قالتلي سجلي صوتو ، في اللحظة دي بالذات قررت إني مش هسجل صوت العصفور لسببين ، السبب الأول إني مش هضيع وقت في البحث عن موبايلي اللي دايما مختفي ، ومش هضيع لحظة مش مركزا فيها مع صوت العصفور ﻷني مركزا إزاي أظبط الصوت والكوالتي وأنا بسجل ، والسبب التاني إني مؤمنة إن مش لازم نمتلك كل حاجة جميلة مش لازم تتحول من طير بيروح ويجي لطير محبوس في قفص سواء تكنولوجي او قفص من الغيرة أو أي نوع من أنواع الحاجات اللي بتخلينا نمتلك العالم
قررت أسيب صوت العصفور الحلو دا يتلاشى في السحاب زي ما هوا بيعمل بالظبط ، قررت إني أحترم الطير دا ومسجلوش صوتو ﻷن صوتو دا ملكو وملكو هوا لوحدو ، يمتع بيه أي كائن ربنا اصطفاه عشان يسمع الصوت دا ..
قررت كمان إني أختلس اللحظة الجميلة دي من عمق الزحمة الرمضانية والخناق مع كل حاجة جوايا وبرايا تقريباً عشان أحكيلكو عن الطائر مجهول الهوية ..
ربنا يرزقكوا بالمتعة دي
بالدغدغة اللي قلبي حسها وهوا بيسمع الطائر الأسطوري المجهول اللي وقعت في حبوا من أول زقزوقة <3
ليست هناك تعليقات:
إرسال تعليق