الأربعاء، 11 سبتمبر 2013

مش فاهمة حاجة!



الكراكيب بتتكركب أكتر والأفكار عمقها بيزيد بالتجربة ، كل حاجة بتربكني وبتضغط على مداخل الهوا في صدري بس عرفت مؤخراً إزاي أستقبل الضغوط العصبية والأفكار بكل أنواعها بنوع من الهدوء ..
آه مش عارفة أعالجها ، مش عارفة أوصل لإجابات وتقريباً نسيت إن الأسئلة موجودة عشان نجيبلها إجابات مش عشان نقف نتفرج عليها ونبحلق فيها !
زي بالظبط المسائل اللي أنا محتاسا فيها وإتسحبت خلسة وسبتها ودخلت على المدونة عشان أشتكي منها وأعترف بكل وضوح وصراحة إن آينشتاين دا راجل عبقري ﻷن بسببو فسرت سبب إختفاء ذكائي الحاد واللي ابتلعه الثقب الأسود زي ما هوا قال في نظرية النسبية !
أو الخيار التاني الأقرب للصحة هو إن ذكائي الحاد دا مش موجود أصلاً وإن أنا مكانش المفروض أدخل كلية هندسة من الأساس ..
المريع في الموضوع إني اكتشفت الإكتشاف المذهل دا وأنا في بكالريوس ! بس عامة مكانش عندي وقت السنين اللي فاتت عشان أفكر في أي حاجة ليها علاقة بمستقبلي أو أي حاجة ليها علاقة بالكلية أصلاً !
بقالي كتير مبقراش ! فعلياً أنا عايشة حياة الموظفة من البيت للكلية ومن الكلية للبيت .. بحاول في المواصلات كل يوم أفتح رواية صغيرة عشان أرجع أقرا تاني ، وبفشل وبقفلها وأستمتع بالإصغاء لصوت الكركبة اللي جوايا ، ووشي في منتهى اللاتعبير ، لدرجة إن في واحدة في الميكروباص إتعرفت عليا وقالتلي إنتي شداني من ساعة ما ركبت ، حساكي رايقة قوي !
رايقة ! أنا رايقة ! الكلمة إنضافت لمجموع الكركبة الداخلية عشان أنا ناقصة أصلي متناقضات ، ورديت عليها بإبتسامة هادية و"شكراً" ..

طب بغض النظر عن كل الكركبة اللي معششة جوايا .. هوا أنا مش هكبر بقى ؟
أنا العالم مش متقبلني كدا ولا أنا متقبلاه ، يا أنا أكبر وأبقى بمشي على الكاتلوج زي الناس أو أضيع خالص زي ناس تانية ، يا إما الناس توسع للي زي مكان ويسمعوهم شوية !
أنا لما بقول لماما على حاجة من اللي جوايا بلاقيها وشها قلب ألوان ومردتش عليا ، وفي ساعات الصفا تقولي "أنا أحياناً بخاف منك.. بخاف من أفكارك !"
أنا مجرد كنت بقولها إن الإنتحار حق طبيعي من حقوق الإنسان وبسردلها وجهة نظري ، وإن المجتمع لازم يحترم قرار زي دا .. لقيتها إنقبضت مني وسكتت وغيرت الموضوع !

بحب أقرا للبنات اللي بيكتبوا في حوليات ! مش عارفة أشكر لبنى إزاي إنها فجرت الطاقة العظيمة دي جوا البنات وطلعت منهم كل الحواديت والحكايات دي ! لبنى تبان رقيقة وجميلة بس أفكارها متوحشة وجبارة !
بقيت بسببها بفتح صفحة الحوليات وأقلب في المدونات اللي لسا مكتوبة طازة بدل الأخبار والجرايد والتوك شوز ..




أنا مش فاهمة حاجة ! مش فاهمة حاجة خالص .. بس بحاول أفهم والله .. والله بحاول أفهم !!

الثلاثاء، 10 سبتمبر 2013

Happiness is .. YOU

والسعادة هيا إنتا يا حبيبي .. السعادة هيا كل تفاصيلك .. كل ملامحك .. كل اللي بتقولو .. اللي بيعجبني منو واللي مبيعجبنيش ..
السعادة هيا اللحظة اللي بقولك فيها حاجة من مليون حاجة ليك جوايا وتبقى عامل زي الطفل البريئ تسكت وتبتسم وتقولي مش عارف أرد !

السعادة هيا شطارتك في كل حاجة ، شطارتك في سرقة قلبي ، وشطارتك  لما بتجرحني وشطارتك لما بتطبطب على جروحي ، شطارتك وإنتا بتظبطلي اللاب ، وشطارتك وإنتا بتسمعني مزيكا كأنها معمولة لينا .. على مقاسنا بالظبط !
شطارتك وإنت بتقتبس لواسيني مقتطفات بتكلم علينا ..

تفاصيلك اللي بتجنني وبتخلي دماغي تدور كأن حد ضارني على راسي ! بحبها ..
لمعة السلسلة اللي في رقبتك اللي بيبقى نفسي أشدك منها لحد ما أعدم المسافة بينا ..
خناقك معايا لما أهمل في أكلي أو صحتي .. بحبو ، بحب خوفك عليا وبحب رخامتك وإنتا بتغيظني وبتنكش خلايا الغيرة جوايا .

بحب أقعد أسمع كلام البنات عن اللي بيحبوهم عشان أحسد نفسي عليك وببقى عايزة أطلعلهم لساني وأقولهم شوفو حبيبي !

كل السعادة إنتا يا ابراهيم .. لو بس الكون يدينا مساحة ! لو يوسع شوية !
لو الناس تبطل تبقى ديقة !
لو ينفع تبقى هنا طول الوقت ومحتاجش أكتبلك وأكلمك كل شوية !
لما أقولك أنا خايفة .. قدر دا عشان إنتا أول واحد ينغزلي قلبي ويجيب آخرو في روحي قوي كدا ..
أول مرة أسيب لحد الحبل عالغارب يسرق كل النوم ولو رجعو يسرق كل أحلامي وتبقى عليه !
بحبك لكل اللي فات ، وبحبك ﻷنك بتجبلي كل أنواع الشوكلاتات اللي بحبها
كادبري ، وكيت كات ، وتويكس !
بحبك عشان لما ببعد عنك بتتحسسني إنك بتحبني بمنتهى الكرامة منغير ما تنزل من نظري وتخليني أنسى كل حاجة وأجري أكلمك ..
بحبك عشان حاجات كتير بينا .. عشان كل الدفا اللي حصل واللي مش هيحصل ..
بحبك عشان كفك أكبر وأدفى من كفي ..
بحبك عشان كل الحاجات الحلوة اللي إنتا مش شايفها في نفسك واللي هخليك تشوفها !

بحبك!




ابراهيم وهوا بيفسد أخلاقي وأنا منشكحة :D :D 


السبت، 7 سبتمبر 2013

بحبك !

عيد ميلاد سعيد يا ابراهيم ..
أنا على عكسك تماماً ، قررت هذه المرة رغم كل ما مررنا به حتى  آخر ليالي سنتك الفائتة أن أطوي معك هذه الصفحة من الألم تماماً ، ربما لن تنسى لي ما حدث وربما لن أنسى لك أيضاً ، ولكن كما أقول دائماً "مينفعش إتنين يرقصو مع بعض رقصة صعبة منغير ما يكونوا واثقين في بعض" وأظن أن ما يدور بيننا اصعب رقصة في تاريخ الرقص بأكمله ..
الثقة يا ابراهيم .. ثق بي كما سأفعل أنا ، دعنا نرمي كل هذا الهراء الذي قتلنا إلى الخلف ونمرر أصبعنا بلطف فوق جروحنا لتلتئم
أنا سأفعل سألقي بروحي إليك كما تلقي أي راقصة بجسدها إلى شريكها بالرقص ، سألقي روحي إليك مجدداً وسأثق أنك لن تخذلها ، وأنت ستفعل ذلك أيضاً .. أنا على يقين ..

ربما لن تكون هذه الكلمات ما توقعته في عيد ميلادك ، ربما توقعت ما هوا أكثر عذوبة و لهفة وشوق ، لكن ربما علينا التعامل مع هذه الكومة من "وجع القلب" قبل المضي مجدداً في طريقنا ..

الثقة يا ابراهيم ! الثقة حجر أساس أي علاقة يا صديقي
أريدك أن تكون على ثقة تامة أن ما فعلته أمس بنفسك وهو الشئ الذي لا أعرفه حتى الآن ، هو من أكثر ما آلمني حتى في حياتي ..
 آمن أرجوك  أننا نتشارك أشياء أكثر بكثير من المساحات .. آمن بأننا تخطينا عتبة الصداقة ولا يمكننا الرجوع بظهورنا إلى الخلف وإذا فعلنا ذلك سنسقط وسترتطم رؤسنا بالأرض حتى تتفتت !
أنا لم أكن أعرف حقاً ما يدور بيننا حتى هذا الصباح ، تيقنت تماماً أنها ليست المساحات يا ابراهيم .. إنما هي الأرواح وما تسكنه ..
دعني أخبرك أيضاً أننا لسنا جسدين منفصلين ﻷنك كدت تقتلني بما فعلت ولا زلت أرقص رقصة الذبيحة حتى هذه اللحظة ولا أعلم لماذا !

لم أخطط ليكون اليوم بهذا القدر من الخذلان ، أردت أن أصلح الأمور وأن أبدو أكثر عقلانية ولكني أفسدت كل شئ كالعادة !

أنا حلمت بك اليوم يا ابراهيم ، لم يكن نوم بقدر ما كان حاجة جسدية للإستسلام والهروب من الإنهيار العصبي والشلل الفكري الذي لم يحدث لي من قبل رغم أن حياتي مسلسل درامي أطول من "the bold and the beautiful " لكنك يا عزيزي ملك البدايات ..
حلمت أني أمشي معك في شارع عريض أمسك يدك كطفلة ، أتعلق بذراعك وأترك كفي الصغيرة تسبح في قبضتك بدون خوف !
بثقة !
وثقت بك في منامي يا ابراهيم ، وأعطيتك روحي .. ولم تخذلني !
أخيراً أود إصلاح ما فسد وإرجاع عقارب الساعة ليوم مضى ، ولكن هذا الخيار ليس متاحاً لي على أيه حال ، وكلمة "آسفة" لن تزيد اللوعة إلا لوعة ..

ربما "بحبك" تستطيع أن ترسم الابتسامة على شفتيك .. :)

بحبك يا ابراهيم






الجمعة، 6 سبتمبر 2013

أنا و داليا

لم نلتق يا عزيزتي وحسب ، أنت تعرفين جيداً أننا إختبرنا الطيران :)
إختبرنا أخيراً أن نثق في أشخاص لا ينهون الحكاية بالخذلان ، ويالدهشة كانوا أطفالاً !
أجدنا الضحك اليوم ، أجدنا الصدق ، وأجدنا أخيراً الخروج من البلادة التي قولبنا أنفسنا فيها عن عمد ..

تعرفين جيداً أننا جئنا لمنحهم الحنان بقلوبنا التي  يملأها البرد الدسم ، وخرجنا بالكثير من الدفئ المخفوق بحبيبات السعادة الزهرية !
أنا أكره محاضرات التنمية البشرية أكثر من السياسيين ، ولكنهن يضفن الجمال على جميع الأشياء مهما كانت متواضعة وسطحية ومكرورة ، اكتشفت يا عزيزتي اني أبصر الأشياء من بعد واحد ، أما هن فلهن أبعاد لا نهائية !
تذكرين حين أخبرت عايدة أن آبار البترول ستجف في خلال خمس سنوات على أفضل تقدير ماذا قالت؟
"دي مش آخر الدنيا هروح وهلف والكرة الأرضية مليانة حاجات مستنياني!"

في تلك اللحظة ، هتف قلبي " رأيت الله رأيت الله" ..

عامة أبهجني إرتدائك الأصفر والأخضر ! لا أحب الأحمر أبداً ، أنتي تعرفين دلالته لأمثالنا جيداً يا عزيزتي ..
إرتدي الأصفر دوماً ، إرتديه لي :)

آه .. أردت أن أشكرك على إنقاذك لي اليوم حين علقت الكلمات والغصة في حلقي
جميعهن أمسكن بيدي وتعجبن عن سبب نحافتي الشديدة ، يتسائلن بشكل متكرر"إنتي رفيعة كدا ليه؟ إنتي مبتاكليش ليه!" كاد يقودني السؤال إلى الهستيريا و البكاء.. ﻷني لم أجد إجابة شافية لهذا السؤال منذ 5 سنوات .. 
كنت سريعة البديهة وأخبرتهن أن "الدنيا حر وهيا نفسها بتتسد من الأكل !" مثلما أخبرتني عند بوابة الدار ..
"أنا بقول اللي ربنا بيبعتو ساعتها بقى :) " أنتي متصلة بالسماء يا عزيزتي .. شكراً
وشكرا على الأحجية التي أهديتها لي ..
وشكراً في المطلق ..


الجمعة، 23 أغسطس 2013

كلنا أضعف من الحقيقة

إزيك يا ميم ؟
حاسة إنك كويس ، أو هتبقى كويس ..
أنا بقى خلصت اليوم إمبارح بالعافية ، أول مرة أنام حوالي 11 ساعة في اليوم عشان تقريبا أول مرة أعيط دا كلو الليلة اللي قبل اللي فاتت ، عملت كل حاجة كنا متفقين عليها في الوقت اللي كنت صاحيا فيه ..
قريت ،وعملت 2 application ، ومعيطتش خالص ،وشتمت في الإخوان ، ومقعتدش كتير عالنت ، نيجي بقى لأهم حتة ، بدأت فيلم The dark knight ..

الفيلم إتفرجت على أول ساعة فيه بالعافية وقمت نمت ، بيتحايلو عليا أشوفو بقالي 3 سنين وفي قايمة أحسن 250 فيلم ،أنا كنت متأكدة إنو هيطلع مقلب ، رغم إنو مش نوعية الأفلام اللي بحبها بس مش عارفة إيه اللي خلاني أسمع الكلام وأحاول أتفرج عليه ، يخربيت الملل ، عامة لازم أكملو بكرة هوا تورنت حرام يعني !
كان نفسي أروح النهاردة أشتري كوتشي رمادي ، بأجل في موضوع الكوتشي بقالي يجي شهر وأول ما إتفقت مع ماما إن إحنا خلاص هننزل نجيب واحد ، قامت حرب الشوارع بتاع إمبارح في طنطا وقالو هيقفلو الشوارع اللي حصلت فيها اشتباكات ومش هجيب الكوتشي الرمادي برضو ! شييييييييييت :(

الجدير بالذكر إني مدخلتش إمبارح الفيس كتير عشان كنت بقاوم إني أقرا رسالتك ، وشفت عالوول بوست كتبتوا فيه شعر لأدونيس ، مش عارفة لو كنت لسا فاكر لسا إني بحب أدونيس ولا نسيت ، وعجبتني القصيدة وكان نفسي تبقى عليا بس لما شفت الايك عرفت إنو ممكن يكون بوست والسلام ، وممكن يكون بوست بس لحد تاني وفي كل الأحوال  في جرح الشعر مش هيطيبوا ..

عايزة أحكيلك إن الليلة اللي قبل دي كنت تعبت جدا وكنت رايحة أصحي ماما وأكمل عياط في حضنها وقعدت أقلب في التليفون على حد أتصل بيه أعيطلو وبعدين رميت الموبايل ، وقاومت رغبتي في إني أبكي لماما عشان أكيد هتقولي مالك ! وممكن تفهم منغير ما أقولها ، فتفقد ثقتها في إختياراتي ، عشان كدا بلعت كل الوجع لوحدي مش عارفة خلص إزاي بس صحيت تاني يوم مش شايفة بعنيا ، تقريبا نمت من العياط ..

كنت قاعدة بتلكك لنفسي النهاردة عشان أكلمك وقاعدة بقول دا عيد ميلادو قرب و قلة ذوق إني مكلمش وهبل كتير كدا كان بيعضعض في دمغي ، بس إفتكرت إني متماسكة بقالي 20 ساعة وعايزة أكمل اليوم منغير وجع قلب ، وعملت كدا !
آه على فكرة أنا مش هناديلك تاني "روح" ، عارف كنت بحط جمبي عالسرير مخدة طويلة كدا ، دايما كنت أسيب المخدة الصغيرة ومحطش راسي عليها وأنيم المخدة الطويلة جمبي بالطول وأحدف راسي عليها وكنت بنام على طول ، على أساس إنها إنتا يعني وكنت بطمن جدا لما أرمي راسي وأتني ضهري التنية السودا دي بس كنت بحبها ، جربت أعمل كدا إمبارح والموضوع منفعش ، قمت شلت المخدة من على السرير خالص ونمت على مخدتي الصغيرة ومفيش حاجة حصلت ..

دايما لما كنت بحتاجك خيالي كان بيسعفني وبيخليني أشوفك بتحضني أو بطبطب عليا عشان أطمن ، المرادي لما إتخيلتك ، حضنتني ولما جيت تبعد سبتلي في قلبي سكينة ومكنتش بعيط ولا موجوعة على قد ما كنت ببصلك وبحكيلك " ليه كدا؟"
حتى النوم ، بقيت بشوفك في الحلم بس بدل الطبطبة بشوف صوابعك ملفوفة حوالين رقبتي وبتخنقني وبقوم مفزوعة ، بس تصالحت أخيرا مع نفسي واكتشفت إن مفيش حد في القوضة غير أنا والمخدة الصعيرة ، ونمنا بسلام لحد ما صحيت وكتبت البوست دا

إكتشفت إني وحشة جدا وإني اصغر من إني أستوعب حقيقة العالم ، أو حتى الحقيقة اللي قلتلي عليها ، مش عارفة كنت بلومك ليه إنك خبيت عني  .. يا ريتك ما قلتلي حاجة!
إنتا صح ، أنا أضعف من الحقيقة ..
كلنا أضعف من الحقيقة .. كلنا على فكرة مش انا لوحدي .. 


الخميس، 22 أغسطس 2013

10/10

بكتب ، بكتب لتأريخ اللحظة ، عشان أحتفظ بالإحساس اللي أنا حساه لقدام يمكن أحتاج أرجع أقراها  ، يمكن هردم على كل السنين الضلمة  التراب في يوم وأبقى مختلفة ، يمكن كمان مش هبقى مضطرة أقوم 4 الفجر عشان أكتب كل الكلام اللي بكتبوا دلوقتي !

حقائق أكيدة :
1_ أنا مجروحة والهروب من الحقيقة دي مش هيطمسها
2_ محتاجا أصلي لجرحي
3_ الثقة لما بتهز بتاخد وقت عشان ترجع مكانها ، رجوع الثقة مش زرار ومش قراري ، الثقة مادة تراكمية
4_مفتقدا أبقى مع الناس  ، وخايفا لو حصل حاجة لقلبي ألاقي فراغ كبير ، لازم أرجع للناس!
5_أول مرة أمر بموقف زي دا ، دايماً كنت بتفرج عليه في الأفلام !
6_النهاردة في مظاهرات في الشارع ، أنا مش ناوية أعيط على حد ، روحوا للموت برجليكوا بقى !أنا مش فاتحا قنواتي الدمعية سبيل
7_ماما أنا مش عايزة أجوز ، أتمنى تشيلي الفكرة من دماغك ، رغبتي مش مقطعاني قوي عشان أروح أجوز أول واحد يخبط عالباب وألحق نفسي قبل ما يفوتني قطر الجواز في العشرينات ، أحلى حاجة في فكرة الجواز والعلاقة يا ماما هوا إن الناس تجيب عيال ، وأنا مش هجيب عيال في بلد زي دي ، أنا زهدت في الجواز .
8_في كل الأحوال أنا هبقى قوية !
9_إحمل عبء قلبك وحدك
10_ الأحضان الدافية بيبقى فيها شوك

حاجات مش اكيدة :
1_النهايات السعيدة
2_ دا تخليص حقوق ودايرة بتدور عليا !؟
3_أنا أنانية !؟
4_هنسى بجد وهسامح من قلبي ولا ﻷ !
5_كوني بحب منغير مقابل !
6_أنا واثقة في نفسي !؟؟؟
7_هنام زي الناس !؟
8_هسافر إسكندرية !؟
9_هسافر أي حتة في البلد دي بعد كدا !؟
10_ حقيقتي!؟